ENG
Нүүр

Made in Mongolia төсөл хөтөлбөр өнөөдөр эхэллээ

2018.01.18

Имарт буюу Скай Хайпермаркет ХХК Үндэсний жижиг дунд үйлдвэрлэгчдийг дэмжих зорилготой “Монголд үйлдвэрлэв” төсөл хөтөлбөрийг санаачлан эхлүүллээ.

МҮХАҮТ, ХХААХҮЯамтай хамтран Монголын Жижиг дунд үйлдвэрлэгчдийг дэмжин ажиллах бөгөөд энэхүү ажлыг хэрэгжүүлэхээр Имарт болон МҮХАҮТ хамтран ажиллах санамж бичигт өнөөдөр гарын үсэг зурлаа.


Санамж бичгийн хүрээнд МҮХАҮТ-аас танхимын гишүүн, ЖДҮ-дийн бараа бүтээгдэхүүнийг Имарт дэлгүүрт худалдаалахад дэмжлэг үзүүлэх, үүнтэй холбоотой дүүрэг, орон нутгийн бизнес эрхлэгчдэд нэгдсэн бодлого, санал, зөвлөмж мэдээлэл, хүргүүлэн Монгол улсын болон Имартын стандартыг хангуулж ажиллах, сав баглаа боодол, бүтээгдэхүүний чанар стандартын талаар сургалт, зөвлөгөө өгч ажиллах юм байна.

Харин Имартын зүгээс ЖДҮ эрхлэгчдийн бараа бүтээгдэхүүнийг тусгайлан тохижуулсан "Монгол үйлдвэрлэв" хэсэгт худалдаалж хэрэглэгчдэд таниулцуулах, борлуулалтыг эрчимжүүлэх, сүлжээ дэлгүүрээр дамжуулан экспортыг нэмэгдүүлэх, ОУ-д сурталчилан таниулахад дэмжлэг үзүүлэн ажиллах болно.


“Монголд үйлдвэрлэв” хөтөлбөр нь 5 үе шаттай үргэлжилж Жижиг дунд үйлдвэрлэгч нарт бараа бүтээгдэхүүнээ худалдаалах, олон нийтэд танилцуулахад шаардлагатай мэдээ мэдээлэл, зөвлөгөө, байр талбай гаргах зэргээр тусламж дэмжлэг, хөнгөлөлт үзүүлэх юм байна.

Өмнө нь 2016 онд Имарт, МҮХАҮТ хамтран “Export to Korea” хөтөлбөрийг хэрэгжүүлэн Монгол чацарганы шүүс Солонгосын Имарт сүлжээнд худалдаалагдаж эхлэсэн билээ.

“Монголд үйлдвэрлэв” төслийн эхний үе буюу Үндэсний үйлдвэрлэлийн бараа бүтээгдэхүүний худалдаа өнөөдөр Имарт дэлгүүрт эхэлсэн бөгөөд Сар шинийн баярт зориулагдсан бараа бүтээгдэхүүнтэй Жижиг дунд үйлдвэрлэгч нар оролцож байна.





Имарт болон МҮХАҮТ хамтын ажиллагааны хүрээнд цаашид 21 аймгийн шилдэг үндэсний үйлдвэрлэлийн бараа бүтээгдэхүүнтэй танилцах, МҮХАҮТ-д үзэсгэлэн гаргах, Имарт дэлгүүрээр худалдаалах боломж нөхцөлөөр хангах, цаашлаад экспортонд гаргах зэрэг олон ажлууд ээлж дараатай хийгдэх болохыг мэдээллээ.


МҮХАҮТ-ын Орлогч дарга М.Сарандаваа

-Санамж бичгийн зорилго нь ЖДҮ эрхлэгчид, орон нутгийн үйлдвэрлэгчдийн бараа бүтээгдэхүүнийг олон улсын франчайз, стандарт шаардлагад нийцүүлэн борлуулах боломжийг олгож байна. Түүнчлэн экспортыг нэмэгдүүлэх тал дээр тодорхой ахиц гарна. Экспортыг, ЖДҮ-ийг дэмжинэ гэж хангалттай ярьдаг, харин энэ бол бодит алхам боллоо. Скай Хайпермаркет ханган нийлүүлэгчдийг чадавхжуулах, бүтээгдэхүүн үйлчилгээгээ хэрэглэгчдэд хүргэх олон улсын туршлагыг нэвтрүүлэх тал дээр амжилттай ажиллах байгаа. Танхимаас эхний ээлжид 100 гаруй үйлдвэрлэгчдийн мэдээллийг хүргүүлж хамтран ажиллаж байна.


Скай Хайпермаркет ХХК-ийн Гүйцэтгэх захирал Л.Жавзмаа

-“Монголд үйлдвэрлэв” төсөл бэлтгэн нийлүүлэгчийг хөгжүүлэх, дэмжих сургах, хамтран ажиллахад чиглэх юм. Энэ нь эцсийн үр дүндээ хэрэглэгчдэд чанартай бүтээгдэхүүнийг хямд үнээр нийлүүлэх зорилготой. Бэлтгэн нийлүүлэгчидтэй нягт хамтран ажиллаж байж зорилгодоо хүрнэ. Танхим манай төслийг дэмжиж мэдээллээр ханган ажиллаж байна. 2018 онд Санамж бичгийн хүрээнд хөдөө орон нутгийн үйлдвэрлэгчидтэй бүсчилсэн байдлаар үйл ажиллагаа зохион байгуулж системтэйгээр хамтран ажиллахаар төлөвлөөд байгаа. Манай ЖДҮ эрхлэгчид бүтээгдэхүүнээ үйлдвэрлээд түүнийгээ өөрсдөө борлуулах гэж хүчээ тарамддаг. Худалдаа ч биш, үйлдвэрлэл ч биш болох нь бий. Энэ байдал нь улс орны үйлдвэрлэлийг хөгжүүлэхгүй байна. “Монголд үйлдвэрлэв” төсөл бол үйлдвэрлэгч зөвхөн үйлдвэрлэлдээ, бүтээгдэхүүний чанартаа санаа тавьж бүтээмж өндөртэй байх боломжийг олгоно.

Сүүлийн нийтлэл